ဩဂုတ် ၄ ၊၂၀၂၅
GG (VOM)
ဖားကန့်ဒေသမှာ တိုက်ပွဲပြင်းထန် ဖြစ်ပွားနေပြီး ဒီနေ့ ဩဂုတ် ၄ ရက်နေ့မနက်ပိုင်းမှာ လက်နက်ကြီးကြောင့် နှစ်ယောက်သေဆုံးကာ လူငါးယောက်ထိခိုက်ဒဏ်ရာရရှိခဲ့တယ်လို့သိရပါတယ်။
မနေ့က ဩဂုတ် ၃ ရက်နေ့မှာဖြစ်ပွားတဲ့ တိုက်ပွဲအကြားမှာလည်း တယောက်သေဆုံးကာ ငါးယောက်ထိခိုက်ဒဏ်ရာရရှိခဲ့တယ်လို့သိရပါတယ်။
လက်ရှိလည်း ဖားကန့် ၊မှော်စီစာရွာရှိ ဘုရားကုန်းဘက်မှာ တိုက်ပွဲဆက်ဖြစ်နေပြီး လက်နက်ကြီးလက်နက်ငယ်ပစ်ခတ်မှုတွေဖြစ်နေတယ်လို့သိရပါတယ်။
” သေတာကနှစ်ရက်မှာဆို သုံး ယောက်ရှိတယ်။ဒဏ်ရာရ ၁၀ယောက်ပေါ့။မနက် ၅ နာရီထဲက တဝုန်းဝုန်းနဲ့ပစ်နေတာ။ အခုထိလည်း တဝုန်းဝုန်းနဲ့ပစ်နေတယ်တယ်။ရှရော်ခရွာဘက်လည်းဖြစ်ဆယ်။ အခုကမှော်စီစာ ဘုရားကုန်းဘက်မှာပစ်နေကြတာ။ဆိုင်တွေလည်းပိတ်ကုန်ကြပြီ။ ရွာထဲလည်းအကုန်ပိတ်တယ်။စစ်တပ်က ဖားကန့်ဒေသကို ပြန်သိမ်းဖို့ ဆက်တိုက်တိုက်ပွဲဖော်နေတဲ့သဘောရှိတယ်။” လို့ ဖားကန့် ဒေသခံကပြောပါတယ်။
ဩဂုတ် ၄ ရက်ဒီနေ့ ဖားကန့်တိုက်ပွဲအကြားသေဆုံးသူတွေက မျောက်ဖြူကျေးရွာကဖြစ်ပြီး သေဆုံးသူနှစ်ယောက်က အသက် ၅ နှစ်အရွယ်ကလေးနဲ့ အသက် ၃၅ နှစ်အရွယ် အမျိုးသားတယောက်ဖြစ်တယ်လို့သိရပါတယ်။
ဩဂုတ် ၃ ရက်နေ့မှာ တိုက်ပွဲအကြား သေဆုံးခဲ့သူတွေကတော့ ရှရော်ခရွာမှ အသက် ၂၁ အရွယ်အမျိုးသားဖြစ်ပြီး ထိခိုက်ဒဏ်ရာရသူတယောက် ဖြစ်ကြောင်း ၊ နောက်ထပ် ဆန်းကြွယ်ရွာမှ လေးယောက်ထိခိုက်ဒဏ်ရာရရှိခဲ့ခြင်းဖြစ်တယ်လို့သိရပါတယ်။
ပြီးခဲ့တဲ့ရက်ပိုင်းကမှ နလအ တပ်တွေ ထိန်းချုပ်ထားတဲ့ ဖားကန့် ဒေသ၊ ရှရော်ခရွာမှာရှိတဲ့ ညောင်ပင်ကုန်းကို ပြန်လည်ရရှိရေးအတွက် KIA ပူးပေါင်းတပ်တွေက ပြန်လည်ထိုးစစ်ဆင်တိုက်ခိုက်နေတာကြောင့် နလအနဲ့ KIA အကြားတိုက်ပွဲပြင်းထန်နေတာဖြစ်တယ်လို့သိရပါတယ်။
တိုက်ပွဲတွေဖြစ်ပွားနေတဲ့ ရှရော်ခရွာ ၊မှော်စီစာ ၊ ဆန်းကြွယ် ဘက်တွေက ဒေသခံတွေကတော့ လတ်တလောမှာ စစ်ဘေးရှောင်နေရတယ်လို့သိရပါတယ်။
လက်ရှိမှာ နလအက ဖားကန့်ဒေသကို ပြန်သိမ်းပိုက်နိုင်ရေးအတွက် ထိုးစစ်ဆင်တိုက်ခိုက်နေတာကြောင့် နလအ တပ်ဖွဲ့တွေ ဆိပ်မူဘက်ကို ရောက်ရှိလာမှာစိုးရိမ်တဲ့အတွက် KIA က ဖားကန့် – ဆိပ်မူ လမ်းကို ပိတ်ထားတယ်လို့သိရပါတယ်။
ဓာတ်ပုံ – ဒေသခံ
